அக்டோபர் மாத ஜிஎஸ்டி வசூல் 4.6% உயர்வு – ரூ.1.95 லட்சம் கோடி வருவாய்!

புதுடில்லி: இந்தியாவின் பொருளாதார வளர்ச்சியை பிரதிபலிக்கும் முக்கியமான அளவுகோலாக விளங்கும் ஜிஎஸ்டி வசூல், அக்டோபர் 2025 மாதத்தில் குறிப்பிடத்தக்க உயர்வை கண்டுள்ளது.

மத்திய நிதியமைச்சகம் வெளியிட்ட சமீபத்திய அறிக்கையின்படி, செப்டம்பர் மாதத்தில் ரூ.1.89 லட்சம் கோடியாக இருந்த ஜிஎஸ்டி வசூல், அக்டோபர் மாதத்தில் 4.6 சதவீதம் அதிகரித்து ரூ.1,95,936 கோடியாக உயர்ந்துள்ளது. இது கடந்த ஆண்டு அதே மாதம் வசூலிக்கப்பட்ட தொகையை விட 9 சதவீதம் அதிகமாகும்.

தொடர்ச்சியாக கடந்த 10 மாதங்களாக ஜிஎஸ்டி வசூல் ரூ.1.8 லட்சம் கோடியை தாண்டி வருவது பொருளாதாரத்தின் வலிமையைக் காட்டுகிறது. குறிப்பாக, செப்டம்பர் 22ஆம் தேதி முதல் அமல்படுத்தப்பட்ட ஜிஎஸ்டி சீர்திருத்தங்கள் இதற்கான முக்கிய காரணமாக கூறப்படுகிறது.

இந்த சீர்திருத்தங்களின் மூலம் ஜிஎஸ்டியின் 4 வரி அடுக்குகள் தற்போது 2 அடுக்குகளாக மாற்றப்பட்டுள்ளன. இதனால் பல பொருட்களின் விலைகள் குறைந்து, மின்னணு சாதனங்கள் உள்ளிட்ட பொருட்களின் விற்பனை அதிகரித்துள்ளது.

கடந்த சில மாதங்களின் ஜிஎஸ்டி வசூல் விவரம்:

• ஜனவரி 2025 – ₹1.96 லட்சம் கோடி

• பிப்ரவரி 2025 – ₹1.84 லட்சம் கோடி

• மார்ச் 2025 – ₹1.96 லட்சம் கோடி

• ஏப்ரல் 2025 – ₹2.36 லட்சம் கோடி

• மே 2025 – ₹2.01 லட்சம் கோடி

• ஜூன் 2025 – ₹1.84 லட்சம் கோடி

• ஜூலை 2025 – ₹1.96 லட்சம் கோடி

• ஆகஸ்ட் 2025 – ₹1.86 லட்சம் கோடி

• செப்டம்பர் 2025 – ₹1.89 லட்சம் கோடி

• அக்டோபர் 2025 – ₹1.95 லட்சம் கோடி

அக்டோபர் மாத ஜிஎஸ்டி வருவாயில் ஏற்பட்ட உயர்வு, பொருளாதாரத்தில் நம்பிக்கையை ஏற்படுத்தியுள்ளதாக நிதி நிபுணர்கள் கூறுகின்றனர்.