ஒரு கிராமமே இணைந்து நடித்துள்ள படம் ”ஏலே”… அசர வைக்கும் இயக்குநர் ஹலீதா!

இயக்குநர் ஹலீதா சமீம் இயக்கத்தில் ஏலே திரைப்படம் இந்த மாதம் வெளியாக உள்ளது.

சமுத்திரக்கனி இந்தப் படத்தில் முக்கியக் கதாபாத்திரத்தில் நடித்துள்ளார். சில்லுக் கருப்பட்டி என்னும் ஆந்தாலஜி திரைப்படத்தின் மூலம் மக்களைக் கவர்ந்த இயக்குநர் ஹலீதா சமீம் தற்போது தனது இரண்டாவது படமாக ஏலே படத்தை வெளியிட உள்ளார். இந்தப் படத்தில் ஜூனியர் நடிகர்களே கிடையாது என்பது சமீபத்தில் வெளியான சிறப்புத் தகவல்.

படங்களில் கதாபாத்திரங்களைத் தவிர கூட்டத்துக்காகவும் பின்னணிக்காகவும் பல ஜூனியர் ஆர்ட்டிஸ்ட்கள் நடிப்பார்கள். ஆனால், ஏலே படத்தைப் பொறுத்த வரையில் ஒரு ஜூனியர் ஆர்டிஸ்ட் கூட நடிக்கவே இல்லையாம். ஏலே படத்தை படம் பிடித்த ஒரு கிராமத்தில் உள்ள அனைவருமே இணைந்து இந்தப் படத்தில் நடித்துள்ளார்களாம்.

சமுத்திரக்கநி உடன் அந்த கிராமத்திலேயே தங்கி இருந்து இந்தப் படத்தை அந்த கிராமத்து மக்களைக் கொண்டே நிறைவு செய்துள்ளார் இயக்குநர் ஹலீதா சமீம். பிப்ரவரி 12-ம் தேதி வெளியாக உள்ள இந்தப் படத்தை தயாரிப்பாளர் சசிகாந்த் உடன் இணைந்து ‘விக்ரம் வேதா’ பட இயக்குநர்கள் புஷ்கர் காய்த்ரி ஆகியோர் தயாரித்துள்ளனர்.

ஒரு கிராமமே இணைந்து நடித்திருப்பதால் ‘ஏலே’ திரைப்படம் மிகவும் யதார்த்தமான படமாக இருக்கும் என எதிர்பார்க்கப்படுகிறது.