துணை முதல்வர் ஓபிஎஸ் பிரச்சார வாகனம் கவிழ்ந்து விபத்து!

துணை முதல்வர் ஓ.பன்னீர் செல்வம் இன்று நீலகிரி தொகுதியில் அதிமுக வேட்பாளரை ஆதரித்து பிரச்சாரம் மேற்கொள்ள இருந்தார். அதற்காக அங்கு சென்ற அவரது பிரச்சார வாகனம் ஊட்டியிலிருந்து கூடலூர் செல்லும்போது நடுவட்டம் என்ற இடத்தில் கவிழ்ந்து விபத்துக்குள்ளானது பரபரப்பை ஏற்படுத்தியுள்ளது.

தமிழகத்தில் அனல் பறக்கும் பிரச்சாரத்தில் அரசியல் கட்சியினர் ஈடுபட்டு வருகின்றனர். இந்நிலையில் நீலகிரி தொகுதி அதிமுக வேட்பாளரை ஆதரித்து கூடலூர், பந்தலூர் ஆகிய இடங்களில் பிரச்சாரம் செய்ய திட்டமிட்டிருந்தார் துணை முதல்வர் ஓபிஎஸ். அவர் பிரச்சாரம் செய்ய இருந்த வாகனம் இன்று காலை 9 மணி அளவில் கூடலூர் மலைப்பாதையில் சென்று கொண்டிருந்தது.

அப்போது நடுவட்டம் என்ற பகுதியில் எதிரே வந்த வாகனத்துக்கு வழிவிடும்போது ஓபிஎஸின் பிரச்சார வாகனம் நிலை தடுமாறி சாலையில் கவிழ்ந்தது. அந்த வாகனத்தில் 8 பேர் இருந்தும் யாருக்கும் எந்த பாதிப்பும் ஏற்படவில்லை. ஓட்டுநர் மற்றும் உதவியாளருக்கு லேசான காயம் ஏற்பட்டதாக கூறப்படுகிறது. அதிர்ஷ்டவசமாக துணை முதல்வர் ஓ.பன்னீர்செல்வம் அந்த வாகனத்தில் வரவில்லை.