WhatsApp ஸ்கிரீன்ஷாட் ரயில் டிக்கெட் செல்லாது.. இந்திய ரயில்வே வெளியிட்ட முக்கிய எச்சரிக்கை!

WhatsApp ஸ்கிரீன்ஷாட் ரயில் டிக்கெட் செல்லாது.. இந்திய ரயில்வே வெளியிட்ட முக்கிய எச்சரிக்கை!

டிஜிட்டல் சேவைகளை விரிவுபடுத்தி வரும் இந்திய ரயில்வே, மொபைல் டிக்கெட்டுகளைப் பயன்படுத்தும் பயணிகளுக்கான முக்கிய விதிமுறைகளை மீண்டும் வலியுறுத்தியுள்ளது. குறிப்பாக, RailOne செயலி மூலம் முன்பதிவு செய்யப்பட்ட டிஜிட்டல் டிக்கெட்டின் வாட்ஸ்அப் ஸ்கிரீன்ஷாட், PDF அல்லது புகைப்படத்தை மட்டும் காட்டுவது செல்லுபடியாகும் டிக்கெட்டாக ஏற்றுக்கொள்ளப்படாது என அதிகாரிகள் தெரிவித்துள்ளனர்.

சமீபத்தில் கோர்பா–விசாகப்பட்டினம் இணைப்பு விரைவு ரயிலில் பயணம் செய்த பெண் ஒருவர், தனது சகோதரர் முன்பதிவு செய்த டிக்கெட்டின் WhatsApp ஸ்கிரீன்ஷாட்டை டிக்கெட் பரிசோதகரிடம் (TTE) காட்டியதாக கூறப்படுகிறது. ஆனால், அசல் டிக்கெட் அவரது மொபைலில் உள்ள அதிகாரப்பூர்வ செயலியில் இல்லாததால், அது செல்லுபடியாகாததாகக் கருதப்பட்டு அபராதம் விதிக்கப்பட்டது.

மேலும் விசாரணையில், ரயில் புறப்பட்ட பிறகே அந்த டிக்கெட் முன்பதிவு செய்யப்பட்டிருந்ததும் அதிகாரிகளால் கண்டறியப்பட்டது. இதுவும் விதிமீறலாக கருதப்பட்டதால் நடவடிக்கை எடுக்கப்பட்டது.

டிஜிட்டல் டிக்கெட் தொடர்பான முக்கிய விதிமுறைகள்

• RailOne செயலி மூலம் வாங்கப்பட்ட முன்பதிவு செய்யப்படாத (Unreserved) டிக்கெட், முன்பதிவு செய்யப்பட்ட அதே மொபைல் எண்ணில் உள்ள செயலியில் இருக்க வேண்டும்.
• WhatsApp ஸ்கிரீன்ஷாட், புகைப்படம், PDF அல்லது வேறு மொபைலுக்கு அனுப்பப்பட்ட நகல்கள் செல்லுபடியாகாது.
• டிக்கெட் பரிசோதனையின்போது TTE, அதிகாரப்பூர்வ செயலிக்குள் இருக்கும் அசல் டிஜிட்டல் டிக்கெட்டையே சரிபார்ப்பார்.
• பயணத்தின் போது டிக்கெட் பதிவு செய்யப்பட்ட அதே மொபைல் போனையும், அது செயல்படும் நிலையிலும் வைத்திருக்க வேண்டும்.
• மொபைல் பேட்டரி முழுமையாக சார்ஜ் செய்யப்பட்டிருப்பதை உறுதி செய்வது அவசியம்.

இந்த விதி எந்த டிக்கெட்டுகளுக்கு பொருந்தும்?

ரயில்வே அதிகாரிகள் விளக்கமளித்ததாவது, இந்த நடைமுறை முக்கியமாக RailOne செயலி மூலம் வாங்கப்படும் முன்பதிவு செய்யப்படாத (Unreserved) டிஜிட்டல் டிக்கெட்டுகளுக்கே பொருந்தும். முன்பதிவு செய்யப்பட்ட (Reserved) டிக்கெட்டுகளுக்கு PNR, அடையாளச் சான்று உள்ளிட்ட விவரங்கள் சரிபார்க்கப்படுவதால், இந்த விதி அதே முறையில் பொருந்தாது.

பயணிகள் கவனிக்க வேண்டியது

டிஜிட்டல் டிக்கெட்டைப் பயன்படுத்தும் முன் பயண தேதி, ரயில் எண், நிலையம் மற்றும் இலக்கு உள்ளிட்ட அனைத்து விவரங்களையும் சரிபார்க்க வேண்டும். மேலும், டிக்கெட்டை ரயில் புறப்படுவதற்கு முன்பே முன்பதிவு செய்திருக்க வேண்டும். விதிமுறைகளைப் பின்பற்றாத பட்சத்தில் டிக்கெட் செல்லாததாகக் கருதப்பட்டு அபராதம் விதிக்கப்படலாம் என இந்திய ரயில்வே எச்சரித்துள்ளது.