வங்கி கணக்கு மாற்றியதால் மகளிர் உரிமைத்தொகை நிறுத்தப்பட்டதா? பெண்களுக்கு முக்கிய அறிவிப்பு!

கலைஞர் மகளிர் உரிமைத்தொகை திட்டத்தில் பயனாளிகளுக்கான முக்கிய தகவல் வெளியாகியுள்ளது. கோவை மாவட்டத்தில் மகளிர் உரிமைத்தொகை கிடைக்காமல் இருந்த பல பெண்கள், மீண்டும் திட்டத்தில் சேர்க்கக் கோரி மனுக்கள் அளித்துள்ளனர். இந்த மனுக்களை அதிகாரிகள் தற்போது பரிசீலனை செய்து வருகின்றனர்.

அதிகாரிகள் தெரிவித்ததாவது, சில பெண்கள் தங்களது வங்கிக் கணக்கை மாற்றியதால், அவர்களுக்கு மாதந்தோறும் வழங்கப்பட்டு வந்த ரூ.1,000 மகளிர் உரிமைத்தொகை இடைநிறுத்தப்பட்டிருந்தது. இதை அறிந்த பலர், சரியான வங்கிக் கணக்கு விவரங்களுடன் மீண்டும் விண்ணப்பித்துள்ளனர். தகுதியானவர்களின் விண்ணப்பங்கள் ஆய்வு செய்யப்பட்டு, அவர்கள் மீண்டும் திட்டத்தில் சேர்க்கப்பட்டு வருகின்றனர்.

இதனிடையே, புதிதாக மகளிர் உரிமைத்தொகை பெறுவதற்காக 10 ஆயிரத்திற்கும் அதிகமான மனுக்கள் அதிகாரிகளிடம் வந்துள்ளதாக தகவல் வெளியாகியுள்ளது. இந்த விண்ணப்பங்களும் ஆய்வுக்கு உட்படுத்தப்பட்டு வருகின்றன.

மனுக்களுடன் இணைக்கப்பட்டுள்ள ரேஷன் கார்டு, வங்கிக் கணக்கு மற்றும் பிற ஆவணங்கள் முழுமையாக சரிபார்க்கப்பட்ட பிறகே விண்ணப்பங்களுக்கு ஒப்புதல் வழங்கப்படுவதாக அதிகாரிகள் தெரிவித்துள்ளனர். அனைத்து தகுதிகளையும் பூர்த்தி செய்யும் பெண்களின் விண்ணப்பங்கள் பரிசீலிக்கப்பட்டு, அவர்கள் திட்டத்தில் சேர்க்கப்படுவார்கள் என்றும் கூறப்பட்டுள்ளது.

எனவே, மகளிர் உரிமைத்தொகை திடீரென நிறுத்தப்பட்டிருந்தால், அதற்கான காரணத்தை சம்பந்தப்பட்ட வட்டாட்சியர் அலுவலகம் அல்லது தொடர்புடைய அதிகாரிகளிடம் நேரில் சென்று தெரிந்து கொள்ளலாம். வங்கிக் கணக்கு அல்லது ஆவணங்களில் பிழை இருந்தால், அவற்றை புதுப்பித்து மீண்டும் சமர்ப்பிப்பதன் மூலம் உரிமைத்தொகையை தொடர்ந்து பெற முடியும்.

மேலும், புதியதாக விண்ணப்பிக்க விரும்பும் பெண்கள், வாரந்தோறும் நடைபெறும் குறைதீர்ப்பு முகாம்களில் கலந்து கொண்டு மனு அளித்து பயன் பெறலாம்.