விமர்சனம்
‘மதகஜராஜா’ திரை விமர்சனம்!
விஷால் நடிப்பில் சுந்தர் சி இயக்கி 12 வருடங்களாக ரிலீஸ் ஆகாமலிருந்த படம் மதகஜராஜா இன்று (ஜனவரி 12, 2025) ரிலீஸ் ஆகியுள்ளது. அதன் விமர்சனத்தை இங்கு விளக்கமாகப் பார்க்கலாம்.
தனது ஊரில் கேபிள் டிவி நடத்தி வரும் விஷால் அஞ்சலியை காதலித்து வருகிறார். சந்தானம், நித்தின் சத்யா மற்றும் பிரபல கிரிக்கெட் வீரர் சடகோப்பன் ரமேஷ் இவரது நண்பர்கள்.
இவர்கள் அனைவரும் தனது பள்ளி ஆசிரியரின் மகள் திருமணத்தில் சந்திக்கிறார்கள். அப்போது சந்தானத்திற்கும் அவரது மனைவிக்கும் உள்ள பிரச்சனையை அறிந்து சரி செய்கிறார். அதே போல சென்னையில் சடகோபன் ரமேஷ் மற்றும் நிதின் சத்யாவிற்கும் சோனு சூட்டிற்கும் இடையில் பிரச்சனை ஏற்பட்டு இருப்பதை அறிந்து அதனை சரி செய்ய போகிறார். அது என்ன ஆனது என்பதே மதகஜராஜா படத்தின் கதை.
தமிழ் சினிமா கடந்த 12 வருடத்தில் பல மாற்றங்களைச் சந்தித்துள்ள நிலையில், சுந்தர் சி எப்போதும் தனது பழைய தனித்துவமான காமெடி கலந்த கதையில் படத்தை இயக்கியுள்ளார். இத்தனை ஆண்டுகளுக்குப் பிறகு படம் ரசிக்கும் படி உள்ளது. லாஜிக் மீறல்கள் இருந்தாலும் அதை காமெடி காட்சிகள் சரி செய்துவிடுகின்றன.
விஷால் வழக்கமான சுந்தர் சி பட ஹீரோக்கள் போல துறுதுறுவென சிறப்பாக நடித்துள்ளார். ஆக்ஷன் காட்சிகளில் மிரட்டியுள்ளார். சந்தானம் ஹீரோவாக நடிக்கத் தொடங்கியதிலிருந்து காமெடி கதாபாத்திரங்களில் நடிக்காமலிருந்து வந்த நிலையில், இதில் அவரது டைமிங் கவுண்டர்கள் சிரிப்பலையை ஏற்படுத்துகின்றன.
அஞ்சலி, வரலட்சுமி இருவரும் கிளாமரை தெளித்துவிட்டுள்ளார்கள். அவர்கள் கதாபாத்திரங்களை உணர்ந்து நடித்துள்ளனர்.
மணிவண்ணன், மனோபாலா, ஆர்யா, நித்தின் சத்யா, சடகோபன் ரமேஷ் என அனைவரும் சிறப்பாக தங்களது பங்களிப்பைச் செய்துள்ளனர். நீண்ட நாட்களுக்குப் பிற மணிவண்ணனைத் திரையில் காண்பது மகிழ்வைத் தருகிறது.
விஜய் ஆண்டனியின் இசை அனைவரையும் தாளம் போட வைக்கிறது. பாடல்களும் ரசிக்கும் படி உள்ளது.
“மதகஜராஜா” ஒரு காலப்போக்கில் தொலைந்து போன திரைப்படத்தை மீண்டும் கொண்டுவரும் முயற்சியாக இருக்கிறது. சில குறிப்பிட்ட தருணங்களில் பாரம்பரிய தமிழ் மசாலா சினிமாவின் மகிழ்ச்சியையும் மீண்டும் அளிக்கிறது. இது நம் பழைய திரைப்படங்களின் ஆத்மாவை கொண்டுள்ள ஒரு சுவாரஸ்யமான படம்.
