மாதுளை சாறு இதய ஆரோக்கியத்திற்கு உதவுமா? தமனி அடைப்பை குறைக்கும் உண்மைகள் என்ன?

இதய ஆரோக்கியத்தை பாதுகாக்க இயற்கை உணவுகள் முக்கிய பங்கு வகிக்கின்றன. அவற்றில் முக்கியமானதாக கருதப்படுவது மாதுளை. குறிப்பாக, மாதுளை சாறு இரத்த ஓட்டத்தை சீராக வைத்திருக்கவும், இதய நோய் அபாயத்தை குறைக்கவும் உதவக்கூடும் என பல ஆய்வுகள் தெரிவிக்கின்றன.

மாதுளை சாற்றில் அதிக அளவில் ஆக்ஸிஜனேற்றிகள் (Antioxidants) உள்ளன. குறிப்பாக பியூனிகலஜின்கள் மற்றும் பாலிபினால்கள் போன்ற சேர்மங்கள் உடலில் ஏற்படும் ஆக்ஸிடேட்டிவ் ஸ்டிரெஸ் (Oxidative Stress) குறைக்க உதவுகின்றன. இதன் மூலம் தமனிகளின் சுவர்கள் சேதமடைவதைத் தடுக்கும் திறன் இதற்கு உள்ளது.

இந்த இயற்கை சேர்மங்கள் உடலில் ஏற்படும் வீக்கத்தை குறைத்து, இரத்த நாளங்களின் செயல்பாட்டை மேம்படுத்துகின்றன. இதனால் இரத்த ஓட்டம் சீராக நடைபெற உதவுகிறது. இதன் மூலம் இதயத்திற்கு தேவையான இரத்த ஓட்டம் சீராக கிடைக்க, இதய நோய் அபாயம் குறைய வாய்ப்புள்ளது.

சில மருத்துவ ஆய்வுகள், மாதுளை சாறு தொடர்ந்து குடிப்பதால் தமனிகளில் பிளேக் படிவதை மெதுவாக்கலாம் எனக் கூறுகின்றன. குறிப்பாக, மூளைக்கு இரத்தம் வழங்கும் கரோடிட் தமனிகளில் தடிமன் குறைவதற்கும் இது உதவக்கூடும் என ஆராய்ச்சிகள் சுட்டிக்காட்டுகின்றன. ஒரு ஆய்வில், தினசரி மாதுளை சாறு குடித்தவர்களில் ஒரு வருடத்தில் தமனி தடிப்பு சுமார் 30% முதல் 35% வரை குறைந்தது பதிவாகியுள்ளது.

மேலும், மாதுளை சாறு இரத்த அழுத்தத்தைக் கட்டுப்படுத்தவும் உதவக்கூடும். இது சிஸ்டாலிக் ரத்த அழுத்தத்தை குறைக்க உதவும் என்பதும் கண்டறியப்பட்டுள்ளது. இரத்த நாளங்களின் நெகிழ்ச்சியை அதிகரிப்பதன் மூலம், இரத்த ஓட்டத்தை மேம்படுத்தும் திறன் இதற்கு உள்ளது.

மாதுளை சாறு “கெட்ட கொழுப்பு” எனப்படும் LDL ஆக்சிடேஷனைத் தடுக்கவும் உதவுகிறது. LDL ஆக்சிடேஷன் அதிகரித்தால் தமனிகளில் பிளேக் உருவாகும் அபாயம் அதிகரிக்கும். இதைத் தடுக்குவது இதய ஆரோக்கியத்திற்கு மிகவும் முக்கியமானது.

அதே நேரத்தில், இது நல்ல கொழுப்பு (HDL) அளவை சமநிலைப்படுத்தவும் உதவக்கூடும். மாதுளையில் உள்ள பொட்டாசியம் போன்ற கனிமச்சத்துகள் இரத்த அழுத்தத்தை கட்டுப்படுத்த உதவுகின்றன.

இன்னும் ஒரு முக்கிய அம்சமாக, மாதுளை சாற்றில் உள்ள இயற்கை சேர்மங்கள் இரத்த நாளங்களின் உட்புற அடுக்கு (Endothelium) செயல்பாட்டை மேம்படுத்துகின்றன. இந்த அடுக்கு சீராக செயல்பட்டால் இரத்த ஓட்டம் சீராக இருக்கும்.

ஆனால், மருத்துவர்கள் வலியுறுத்துவது என்னவெனில், மாதுளை சாறு தமனி அடைப்புகளை குணப்படுத்தும் நேரடி சிகிச்சை அல்ல. இது ஒரு ஆரோக்கியமான உணவின் ஒரு பகுதியாக மட்டுமே கருதப்பட வேண்டும்.

இதய நோய், உயர் இரத்த அழுத்தம் அல்லது கொழுப்பு அதிகம் உள்ளவர்கள் மாதுளை சாறு குடிப்பதற்கு முன் மருத்துவரை அணுகுவது அவசியம். குறிப்பாக மருந்துகள் எடுத்துக் கொண்டிருப்பவர்கள் கவனமாக இருக்க வேண்டும்.

மேலும், அதிக சர்க்கரை சேர்க்கப்பட்ட பாட்டில் சாறுகளை தவிர்த்து, இயற்கையான மற்றும் இனிப்பில்லாத மாதுளை சாற்றைத் தேர்வு செய்வது நல்லது. புதிய மாதுளை பழத்தை நேரடியாக சாப்பிடுவது கூடுதல் நன்மைகளை அளிக்கும்.

மொத்தத்தில், மாதுளை சாறு ஒரு ஆரோக்கியமான வாழ்க்கை முறையின் ஒரு பகுதியாக இருந்தால் இதய ஆரோக்கியத்தை மேம்படுத்த உதவும். ஆனால், இது மருத்துவ சிகிச்சைக்கு மாற்றாக இருக்காது என்பதை நினைவில் கொள்ள வேண்டும்.