காஞ்சிபுரம் பட்டு சேலையில் பட்ஜெட் டேப்லெட்: நிதியமைச்சர் நிர்மலா சீதாராமன் உருவாக்கிய புதிய வரலாறு

பட்ஜெட் 2026 தாக்கல் செய்யும் நாளை முன்னிட்டு, நிதியமைச்சர் நிர்மலா சீதாராமன், சிவப்பு நிற கவரில் பட்ஜெட் டேப்லெட்டுடன் கார்த்தவ்ய பவனில் தோன்றி, இந்திய அரசியல் மற்றும் பொருளாதார வரலாற்றில் மற்றொரு முக்கிய தருணத்தை உருவாக்கினார். தொடர்ந்து ஒன்பதாவது முறையாக மத்திய பட்ஜெட்டை தாக்கல் செய்யவுள்ள முதல் நிதியமைச்சர் என்ற பெருமையையும் அவர் பெற்றுள்ளார்.

இந்த முக்கிய தருணத்தில், அவர் அணிந்திருந்த கையால் நெய்யப்பட்ட காஞ்சிபுரம் பட்டு சேலை, தமிழ்நாட்டின் நெசவு பாரம்பரியத்தையும் கலாச்சார பெருமையையும் தேசிய அளவில் முன்னிறுத்தியது. இதற்கு முன்பு மங்களகிரி, இகத், போம்கை, காந்தா, மதுபனி போன்ற பல்வேறு மாநிலங்களின் கைநெய்த ஆடைகளை அவர் பட்ஜெட் நாளில் அணிந்து, இந்திய கைத்தறி கலைஞர்களுக்கு ஆதரவாக இருந்துள்ளார்.

நிதியமைச்சகத்திலிருந்து ராஷ்டிரபதி பவனுக்கு சென்ற நிர்மலா சீதாராமன், குடியரசுத் தலைவர் திரௌபதி முர்முவை சந்தித்து மரியாதை நிமித்தமாக ஆலோசனை மேற்கொண்டார். இந்த ஆண்டு, இந்திய வரலாற்றில் முதன்முறையாக, பட்ஜெட் ஞாயிற்றுக்கிழமை அன்று தாக்கல் செய்யப்படுவது குறிப்பிடத்தக்கது. 2017 முதல் பிப்ரவரி 1 ஆம் தேதி பட்ஜெட் தினமாக நிர்ணயிக்கப்பட்டதை தொடர்வதற்காக இந்த மாற்றம் செய்யப்பட்டுள்ளது.

இதன் தொடர்ச்சியாக, பிஎஸ்இ மற்றும் என்எஸ்இ பங்குச்சந்தைகளும் ஞாயிற்றுக்கிழமை வர்த்தகத்திற்கு திறக்கப்பட்டுள்ளன. இது இந்திய பங்குச்சந்தை வரலாற்றில் இரண்டாவது முறை நிகழ்கிறது.

இந்த ஆண்டு பட்ஜெட் உரையின் Part B பகுதியில், இந்தியாவின் பொருளாதார எதிர்காலக் காட்சியை நிதியமைச்சர் விளக்கவுள்ளதாக தகவல்கள் தெரிவிக்கின்றன. குறுகிய கால முன்னுரிமைகளுடன் நீண்டகால வளர்ச்சி இலக்குகளையும் இணைக்கும் இந்த பார்வை, 21ஆம் நூற்றாண்டின் இரண்டாம் காலாண்டில் இந்தியாவின் உள்ளூர் பலங்களையும் உலகளாவிய கனவுகளையும் பிரதிபலிக்கும் என எதிர்பார்க்கப்படுகிறது.