8வது ஊதியக் குழு: ஃபிட்மெண்ட் ஃபேக்டர் 4 ஆக உயருமா? குறைந்தபட்ச அடிப்படை சம்பளம் ரூ.72,000 ஆகும் வாய்ப்பு!

மத்திய அரசு ஊழியர்கள் மற்றும் ஓய்வூதியதாரர்கள் ஆவலுடன் எதிர்பார்த்து வரும் 8வது ஊதியக் குழு தொடர்பான புதிய தகவல்கள் வெளியாகியுள்ளன. குறிப்பாக, புதிய ஊதிய அமைப்பை நிர்ணயிப்பதில் முக்கிய பங்கு வகிக்கும் ‘ஃபிட்மெண்ட் ஃபேக்டர்’ குறித்த விவாதங்கள் தற்போது தீவிரமடைந்துள்ளன.

ஃபிட்மெண்ட் ஃபேக்டர் என்பது தற்போதைய அடிப்படைச் சம்பளத்தை புதிய சம்பளமாக மாற்ற பயன்படுத்தப்படும் பெருக்கல் விகிதமாகும். இதன் அடிப்படையில்தான் அரசு ஊழியர்களின் புதிய அடிப்படை ஊதியம் கணக்கிடப்படுகிறது.

கடந்த 2016ஆம் ஆண்டு அமல்படுத்தப்பட்ட 7வது ஊதியக் குழுவில், ஃபிட்மெண்ட் ஃபேக்டர் 2.57 ஆக நிர்ணயிக்கப்பட்டது. இதன் மூலம் ரூ.16,000 அடிப்படைச் சம்பளம் பெற்ற ஊழியரின் சம்பளம் ரூ.41,120 ஆக உயர்ந்தது.

ஆனால் கடந்த 10 ஆண்டுகளில் பணவீக்கம் மற்றும் வாழ்க்கைச் செலவுகள் கணிசமாக அதிகரித்துள்ளன. பணவீக்கம் மட்டும் சுமார் 56 சதவீதம் உயர்ந்துள்ளதாக கூறப்படுகிறது. இதனால் தற்போதைய பொருளாதார சூழ்நிலைக்கு ஏற்ப அதிக ஊதிய உயர்வு தேவை என ஊழியர் சங்கங்கள் வலியுறுத்தி வருகின்றன.

பொருளாதார நிபுணர்களின் கணிப்புப்படி, 8வது ஊதியக் குழுவில் ஃபிட்மெண்ட் ஃபேக்டர் 2.28 முதல் 2.86 வரை நிர்ணயிக்கப்படலாம். ஒருவேளை 2.86 ஆக நிர்ணயிக்கப்பட்டால், தற்போது ரூ.18,000 ஆக உள்ள குறைந்தபட்ச அடிப்படைச் சம்பளம் ரூ.51,480 ஆக உயர வாய்ப்பு உள்ளது.

இருப்பினும், மத்திய அரசு ஊழியர்கள் மற்றும் பல்வேறு ஊழியர் சங்கங்கள், ஃபிட்மெண்ட் ஃபேக்டரை 3.0 முதல் 4.0 வரை உயர்த்த வேண்டும் என கோரிக்கை விடுத்துள்ளன. குறிப்பாக, 4.0 என்ற அளவில் நிர்ணயிக்கப்பட்டால், குறைந்தபட்ச அடிப்படைச் சம்பளம் ரூ.72,000 ஆக உயரக்கூடும் என்று கணக்கிடப்பட்டுள்ளது.

இதற்கிடையில், இந்திய ரயில்வே தொழில்நுட்ப பணியாளர்கள் சங்கமான IRTSA, பணியின் தன்மை மற்றும் சவால்களின் அடிப்படையில் ஐந்து நிலை ஊதிய அமைப்பை கொண்டு வர வேண்டும் என வலியுறுத்தியுள்ளது. மேலும், தங்களுக்கு குறைந்தபட்ச அடிப்படைச் சம்பளமாக ரூ.52,600 வழங்க வேண்டும் என்ற கோரிக்கையையும் முன்வைத்துள்ளது.

தற்போது 8வது ஊதியக் குழு நாடு முழுவதும் உள்ள ஊழியர் சங்கங்கள், ஓய்வூதியதாரர்கள் மற்றும் பிற பங்குதாரர்களிடம் கருத்துகளை சேகரித்து வருகிறது. கோரிக்கைகள் மற்றும் பரிந்துரைகளை சமர்ப்பிப்பதற்கான காலக்கெடு ஜூன் 15, 2026 வரை நீட்டிக்கப்பட்டுள்ளது.

மேலும், நிலவரங்களை நேரடியாக ஆய்வு செய்வதற்காக ஜூலை 6 மற்றும் 7 ஆகிய தேதிகளில் புவனேஸ்வர் நகருக்கும், ஜூலை 9 மற்றும் 10 தேதிகளில் கொல்கத்தாவுக்கும் ஊதியக் குழு பயணம் மேற்கொள்ள திட்டமிட்டுள்ளது. இந்த ஆலோசனைகளின் அடிப்படையில், மத்திய அரசு ஊழியர்களின் எதிர்கால ஊதிய அமைப்பு குறித்த முக்கிய பரிந்துரைகள் உருவாகும் என எதிர்பார்க்கப்படுகிறது.