8வது ஊதியக்குழுவில் பெரிய மாற்றம்? ‘3 குடும்ப அலகு’ முறைக்கு பதில் ‘5 குடும்ப அலகு’ சூத்திரம் கோரும் ஊழியர்கள்!

8வது ஊதியக்குழு அமல்படுத்தப்படுவது குறித்து மத்திய அரசு ஊழியர்களும் ஓய்வூதியதாரர்களும் மிகுந்த எதிர்பார்ப்புடன் காத்திருக்கின்றனர். இந்த நிலையில், ஊதிய கணக்கீட்டு முறையில் முக்கியமான மாற்றம் ஒன்றை மேற்கொள்ள வேண்டும் என்று ஊழியர் சங்கங்கள் மத்திய அரசிடம் வலியுறுத்தியுள்ளன.

தற்போது, அரசு ஊழியர்களின் குறைந்தபட்ச ஊதியம் மற்றும் வாழ்க்கைச் செலவை கணக்கிடுவதற்கு பயன்படுத்தப்படும் “3-குடும்ப அலகு” (3 Family Unit) சூத்திரம் நடைமுறையில் உள்ளது. ஆனால் தற்போதைய பொருளாதார சூழ்நிலை, விலைவாசி உயர்வு மற்றும் குடும்பச் செலவினங்களின் அதிகரிப்பை கருத்தில் கொண்டு, இந்த முறையை மாற்ற வேண்டும் என்று ஊழியர் அமைப்புகள் கோரிக்கை விடுத்துள்ளன.

இதற்குப் பதிலாக, “5-குடும்ப அலகு” (5 Family Unit) சூத்திரத்தை அமல்படுத்த வேண்டும் என்பதே அவர்களின் முக்கிய கோரிக்கையாகும். இந்த புதிய சூத்திரத்தில், கணவன், மனைவி மற்றும் மூன்று குழந்தைகள் அடங்கிய குடும்பத்தின் அடிப்படை தேவைகள் கணக்கில் எடுத்துக்கொள்ளப்படும். இதனால் உண்மையான வாழ்க்கைச் செலவுகளுக்கு ஏற்ப ஊதியம் நிர்ணயிக்கப்படும் என ஊழியர் சங்கங்கள் வாதிடுகின்றன.

ஊழியர் பிரதிநிதிகளின் கூற்றுப்படி, பழைய 3-குடும்ப அலகு முறை தற்போதைய வாழ்க்கைச் சூழலுக்கு பொருந்தாததாகிவிட்டது. கல்வி, மருத்துவம், வீட்டு வாடகை, உணவுப் பொருட்கள் உள்ளிட்ட அத்தியாவசிய செலவுகள் பல மடங்கு உயர்ந்துள்ளதால், புதிய குடும்ப அமைப்பை அடிப்படையாகக் கொண்ட ஊதிய நிர்ணயம் அவசியமாகியுள்ளது.

இந்த கோரிக்கை ஏற்கப்பட்டால், 8வது ஊதியக்குழுவின் கீழ் மத்திய அரசு ஊழியர்களின் அடிப்படை சம்பளத்தில் குறிப்பிடத்தக்க உயர்வு ஏற்படும் வாய்ப்பு இருப்பதாக கூறப்படுகிறது. அதேபோல் ஓய்வூதியதாரர்களின் ஓய்வூதியமும் அதிகரிக்கலாம் என்ற எதிர்பார்ப்பு நிலவுகிறது.

மேலும், அகவிலைப்படி (DA), வீட்டு வாடகை படி (HRA) மற்றும் பிற சலுகைகளிலும் மாற்றங்கள் வரலாம் என்று தகவல்கள் வெளியாகியுள்ளன. இருப்பினும், இதுகுறித்து மத்திய அரசு இன்னும் அதிகாரப்பூர்வ அறிவிப்பு வெளியிடவில்லை.

8வது ஊதியக்குழு தொடர்பான அறிவிப்புகள் மற்றும் பரிந்துரைகள் குறித்து லட்சக்கணக்கான அரசு ஊழியர்களும் ஓய்வூதியதாரர்களும் ஆவலுடன் எதிர்நோக்கி வருகின்றனர்.