வணிகம்
முன்பதிவற்ற டிக்கெட் பதிவுக்கான UTS செயலி மார்ச் 1 முதல் செயல்படாது; RailOne-ல் சேவைகள் ஒருங்கிணைப்பு
இந்திய ரயில்வேயின் முன்பதிவற்ற பயண டிக்கெட் (Unreserved Ticketing System – UTS) பதிவு செய்ய பயன்பட்டுவரும் UTS மொபைல் செயலி, வரும் மார்ச் 1 முதல் செயல்படாது என ரயில்வே துறை அறிவித்துள்ளது. UTS செயலியில் வழங்கப்பட்ட அனைத்து சேவைகளும் இனி RailOne என்ற ஒரே செயலியில் ஒருங்கிணைக்கப்பட்டுள்ளதாகவும் தெரிவிக்கப்பட்டுள்ளது.
இதன் மூலம் பயணிகள் முன்பதிவற்ற டிக்கெட் பதிவு, பயண விவரங்கள், ரயில் தகவல்கள் உள்ளிட்ட பல்வேறு சேவைகளை RailOne செயலி மூலம் ஒரே இடத்தில் பெற முடியும். பயனர் அனுபவத்தை மேம்படுத்தவும், சேவைகளை எளிமைப்படுத்தவும் இந்த மாற்றம் மேற்கொள்ளப்பட்டுள்ளதாக ரயில்வே விளக்கம் அளித்துள்ளது.
மேலும், தற்போது UTS Wallet-ல் இருப்பது போன்ற இருப்புத் தொகையை RailOne செயலிக்கு மாற்றிக் கொள்ளலாம் என்றும் ரயில்வே அறிவித்துள்ளது. இதனால் பயணிகள் தங்களுடைய பணத்தை இழக்காமல், புதிய செயலியில் தொடர்ந்து பயன்படுத்த முடியும்.
ரயில்வே பயணிகள் அனைவரும் மார்ச் 1க்கு முன்னர் RailOne செயலியை பதிவிறக்கம் செய்து, தேவையான மாற்றங்களை மேற்கொள்ளுமாறு அறிவுறுத்தப்பட்டுள்ளனர். இந்த ஒருங்கிணைப்பின் மூலம் டிஜிட்டல் சேவைகள் மேலும் விரிவாகவும், வசதியாகவும் கிடைக்கும் என எதிர்பார்க்கப்படுகிறது.
