பலகார சீட்டு நடத்துவோர் கவனத்திற்கு – இந்த விஷயங்களை மறக்காமல் செய்யுங்கள்!

தீபாவளி பண்டிகையை முன்னிட்டு இனிப்பு மற்றும் கார உணவுப் பொருட்களை தயாரித்து விற்பனை செய்யும் அனைவருக்கும் விருதுநகர் மாவட்ட நிர்வாகம் சில முக்கியமான விதிமுறைகளை அறிவித்துள்ளது. சில நாட்களில் வரவிருக்கும் தீபாவளி பண்டிகை சமயத்தில், பட்டாசுகளுக்கு அடுத்தபடியாக இனிப்புகளுக்கும் அதிக முக்கியத்துவம் கிடைக்கின்றது. இதனால், பல வணிகர்கள் பலகார சீட்டு நடத்தி, இனிப்பு மற்றும் கார வகைகளை விற்பனை செய்து வருகிறார்கள்.

இந்த நிகழ்வின் போது உணவுப் பொருள்களின் தரத்தை பாதுகாக்கும் வகையில், சில முக்கியமான விதிமுறைகளை விருதுநகர் மாவட்ட ஆட்சியர் வெளியிட்டுள்ளார். இதற்கமைய, இனிப்பு மற்றும் கார வகைகளை தயாரித்து விற்பனை செய்யும் அனைத்து வணிகர்களும் உணவு பாதுகாப்பு துறையில் பதிவு செய்து, உரிய சான்றிதழ் பெற்றிருந்தே விற்பனை செய்ய வேண்டும்.

மேலும், கலப்படம் இல்லாத மூலப்பொருட்களை மட்டும் பயன்படுத்த வேண்டும். அனுமதிக்கப்படாத அளவுக்கு நிறமிகள் சேர்க்க கூடாது. தரமான நெய் மற்றும் எண்ணெய் பயன்படுத்த வேண்டும், ஒருமுறை பயன்படுத்திய எண்ணெய் மீண்டும் பயன்படுத்தப் படக்கூடாது.

தடைசெய்யப்பட்ட பிளாஸ்டிக் பொருட்கள் முழுமையாக தவிர்க்கப்பட வேண்டும். விற்பனை செய்யப்படும் பொருள்களின் பொட்டலத்தில் உணவுப் பொருளின் பெயர், எடை, தயாரிப்பு தேதி, காலாவதி தேதி, மற்றும் விற்பனையாளர் முகவரி போன்ற விவரங்கள் குறிப்பிடப்பட்டிருக்க வேண்டும்.

இவை அனைத்தையும் கடைபிடிப்பது, வாடிக்கையாளர்களுக்கு தரமான உணவுப் பொருள்களை வழங்குவதற்கு முக்கியமானது.