உலகம்
சிறுவனுக்கு உதட்டில் முத்தம்: மன்னிப்பு கேட்ட தலாய் லாமா!
திபெத்திய புத்த மத தலைவரான தலாய் லாமா சிறுவன் ஒருவனுக்கு உதட்டில் முத்தமிட்டு பின்னர் தனது நாக்கை நீட்டி நாக்கில் முத்தமிட சொல்லும் வீடியோ ஒன்று வெளியாகி சர்ச்சையை ஏற்படுத்தியிருந்தது. இந்த விவகாரத்தில் தலாய் லாமா தற்போது மன்னிப்பு கேட்டுள்ளார்.
#image_title
வைரலாக பரவி வரும் இந்த வீடியோவில் மேடையில் அமர்ந்து இருக்கும் தலாய் லாமாவிற்கு மரியாதை செலுத்த சிறுவன் ஒருவன் அருகே வருகிறான். அந்த சிறுவனை பிடித்து உதட்டில் முத்தம் கொடுக்கிறார் ஆன்மீக தலைவர் தலாய் லாமா. இதனை தொடர்ந்து சில விநாடிகளுக்கு பின்னர் தனது நாக்கை வெளியே நீட்டி அதனை முத்தமிடுமாறு தலாய் லாமா சிறுவனிடம் வலியுறுத்துகிறார். இதற்கு மறுக்கும் சிறுவன், தலாய் லாமா தனது கையை பிடித்து இருந்ததால் வேறு வழியில்லாமல் அவரின் நாக்கில் முத்தமிட்டுவிட்டு சென்றுவிட்டான்.
தலாய் லாமாவின் இந்த செயலுக்கு கடும் கண்டனங்கள் எழுந்தது. இது தலாய் லாமாவின் அத்துமீறல் என ஒரு தரப்பினர் கடுமையாக விமர்சித்து வருகின்றனர், மற்றொரு தரப்பினர் தலாய் லாமா விளையாட்டாகவே சிறுவனுக்கு முத்தமிட்டார் என அவருக்கு ஆதரவாக கருத்துக்களை கூறிவருகின்றனர்.
இந்த சூழ்நிலையில் தனது செயலுக்கு மன்னிப்பு கேட்டுள்ளார் தலாய் லாமா. இது தொடர்பாக அவர் வெளியிட்டுள்ள டுவிட்டர் பதிவில், சிறுவனின் உதட்டில் முத்தமிட்டதற்கு மன்னிப்பு கேட்டுக்கொள்கிறேன். சிறுவன், அவனின் குடும்பம், உலக நண்பர்கள், சகோதரர்களிடமும் மன்னிப்பு கேட்கிறேன். என்னுடைய செயல் காயப்படுத்தியிருந்தால் வருத்தம் தெரிவித்துக்கொள்கிறேன்.
பொது இடங்கள், கேமராக்கள் முன்னிலையில் நான் சந்திக்கும் மக்களிடம் விளையாட்டுத்தனமான முறையில் அடிக்கடி கிண்டல் செய்வது போல, இப்போதும் இது நடந்து விட்டது என தெரிவித்துள்ளார். கடந்த 2019-ஆம் ஆண்டு, தனக்குப் பின் தலாய் லாமாவாக ஒரு பெண் வந்தால் அவர் மிக அழகாக இருக்க வேண்டும் என அவர் பேசியது சர்ச்சை ஆனது. பின்னர் தனது பேச்சுக்கு தலாய் லாமா மன்னிப்பு கேட்டார் என்பதும் குறிப்பிடத்தக்கது.
