சினிமா செய்திகள்
சன் குழுமத்தின் ரூ.600 கோடி தமிழ் திரைப்பட தயாரிப்பு திட்டம்!
கலாநிதி மாறன் தலைமையிலான சன் டிவி குழுமம், 600 கோடி ரூபாய் முதலீட்டில் திரைப்படங்கள் மற்றும் ஓடிடி தளங்களுக்கான பொழுதுபோக்கு நிகழ்ச்சிகளைத் தயாரிக்க முடிவு செய்துள்ளது.
சன் குழுமம் தொலைக்காட்சி, திரைப்படங்கள், ஓடிடி, டிடிஎச், பத்திரிக்கைகள் என்று பல்வேறு தளங்களில் தென் இந்தியாவில் தங்களது வணிகத்தைச் செய்து வருகிறது.
சென்ற ஆண்டு பெங்காலியில் சன் பாங்லா சேனல் தொடங்கப்பட்டது. அடுத்ததாக சன் மாராட்டி சேனல் தொடங்குவதற்கான பணியிலும் உள்ளது.
மறுபக்கம் தென் இந்தியாவில் தங்களது வணிகத்தை அதிகரிக்க, 400 கோடி ரூபாய் முதலீட்டில் முக்கிய நடிகர்களை வைத்து படங்களை தயாரித்து வெளியிட முடிவு செய்துள்ளது.
சன் பிக்சர்ஸ் கையில் இப்போது ரஜினிகாந்த் நடித்து வரும் அண்ணாத்த, விஜய்யின் தளபதி 65, சூர்யா 40, தனுஷ் 44, ராகவா லாரன்ஸ், சிவகார்த்திகேயன் நடிப்பில் ஒரு படம் எனப் பட்டில் நீள்கிறது.
அதுமட்டுமல்லாமல் வளர்ந்து வரும் சன் நெக்ஸ்ட் ஓடிடி தளத்திற்காகவும் 200 கோடி ரூபாயை ஒதுக்கியுள்ளது. இதன் மூலம் நேரடி ஓடிடி, தொலைக்காட்சிகளுக்கான திரைப்படங்களை சன் குழுமம் தயாரிக்கிறது.
சன் குழுமத்தின் இந்த திட்டத்தைப் பார்க்கும் போது 2021-ம் ஆண்டு சன் பிக்சர்ஸ் திரை அரங்குகள் மட்டுமல்லாமல் தொலைக்காட்சி, ஓடிடி தளங்களிலும் மிகப் பெரிய வளர்ச்சியைப் பெறும் என்று எதிர்பார்ப்பு நிலவுகிறது.