8வது ஊதியக்குழு அரியர்: அரசு ஊழியர்களுக்கு ரூ.5 லட்சம் முதல் ரூ.14 லட்சம் வரை நிலுவைத் தொகை கிடைக்குமா? புதிய கணக்கீடு வெளியீடு!

8வது ஊதியக்குழு (8th Pay Commission) தொடர்பான எதிர்பார்ப்புகள் மத்திய அரசு ஊழியர்கள் மற்றும் ஓய்வூதியதாரர்கள் மத்தியில் நாளுக்கு நாள் அதிகரித்து வருகின்றன. புதிய ஊதியக்குழு அமலுக்கு வந்தால் சம்பள உயர்வுடன், கணிசமான அளவில் அரியர் (Arrears) தொகையும் கிடைக்கக்கூடும் என்ற தகவல்கள் சமூக வலைதளங்களில் பரவி வருகின்றன.

மத்திய அரசு இதுவரை 8வது ஊதியக்குழுவின் பரிந்துரைகள் அல்லது அமல்படுத்தும் தேதி குறித்து அதிகாரப்பூர்வ அறிவிப்பை வெளியிடவில்லை. இருப்பினும், அரசு ஊழியர்கள் புதிய சம்பள அமைப்பு ஜனவரி 1, 2026 முதல் அமலுக்கு வரும் என்ற நம்பிக்கையில் உள்ளனர்.

8வது ஊதியக்குழு எப்போது அமலுக்கு வரும்?

பொதுவாக மத்திய அரசு ஒவ்வொரு 10 ஆண்டுகளுக்கும் ஒரு முறை புதிய ஊதியக்குழுவை அமல்படுத்தி வருகிறது. 7வது ஊதியக்குழு ஜனவரி 1, 2016 முதல் நடைமுறைக்கு வந்ததால், 8வது ஊதியக்குழு ஜனவரி 1, 2026 முதல் அமலுக்கு வர வேண்டும் என்ற எதிர்பார்ப்பு நிலவுகிறது.

ஆனால், பல்வேறு மதிப்பீடுகளின்படி, 8வது ஊதியக்குழுவின் நடைமுறை அமலாக்கம் 2027 நடுப்பகுதி அல்லது 2028 தொடக்கத்தில் நடைபெறக்கூடும் என கூறப்படுகிறது. புதிய சம்பள விகிதம் பின்னோக்கி (Retrospective Effect) அமல்படுத்தப்பட்டால், ஊழியர்களுக்கு பல மாதங்களுக்கான நிலுவைத் தொகை கிடைக்கும் வாய்ப்பு உள்ளது.

அரியர் தொகை எவ்வாறு கணக்கிடப்படுகிறது?

அரியர் தொகை கணக்கிடும் முறை மிகவும் எளிமையானது.

அரியர் = மாதாந்திர சம்பள உயர்வு × தாமதமான மாதங்களின் எண்ணிக்கை

அதாவது, தற்போதைய சம்பளத்திற்கும் புதிய சம்பளத்திற்கும் இடையிலான வித்தியாசம் எவ்வளவு இருக்கிறதோ, அதனை தாமதமான மாதங்களின் எண்ணிக்கையால் பெருக்கினால் அரியர் தொகை கணக்கிடப்படுகிறது.

ஃபிட்மென்ட் ஃபாக்டர் 3.68-க்கு அதிக முக்கியத்துவம்

ஊழியர் சங்கங்கள் தற்போது 3.68 என்ற ஃபிட்மென்ட் ஃபாக்டரை அமல்படுத்த வேண்டும் என்று வலியுறுத்தி வருகின்றன. இந்த கோரிக்கையை அரசு ஏற்றுக்கொண்டால், மத்திய அரசு ஊழியர்களின் அடிப்படை சம்பளத்தில் மிகப்பெரிய உயர்வு ஏற்படலாம்.

குறைந்தபட்ச ஊதியம் பெறுபவர்களுக்கு எவ்வளவு அரியர்?

தற்போது குறைந்தபட்ச அடிப்படை சம்பளம் ரூ.18,000 ஆக உள்ளது. 3.68 ஃபிட்மென்ட் ஃபாக்டர் அமல்படுத்தப்பட்டால், அது ரூ.66,240 ஆக உயரக்கூடும்.

இதனால் மாதந்தோறும் ரூ.48,240 கூடுதல் சம்பளம் கிடைக்கும். 10 மாதங்களுக்கு இந்த வித்தியாசம் கணக்கிடப்பட்டால், அரியர் தொகை சுமார் ரூ.4.82 லட்சம் வரை கிடைக்க வாய்ப்பு உள்ளது.

உயர்நிலை அதிகாரிகளுக்கு ஜாக்பாட்?

உயர் பதவியில் உள்ள அதிகாரிகளின் தற்போதைய அடிப்படை சம்பளம் ரூ.2.5 லட்சம் என எடுத்துக்கொண்டால், 3.68 ஃபிட்மென்ட் ஃபாக்டர் அமலுக்கு வந்த பிறகு அது ரூ.9.2 லட்சம் வரை உயரலாம்.

இதனால் மாதந்தோறும் சுமார் ரூ.6.7 லட்சம் சம்பள வித்தியாசம் உருவாகும். புதிய சம்பள அமைப்பு அமல்படுத்துவதில் தாமதம் ஏற்பட்டால், அவர்களுக்கு கிடைக்கும் அரியர் தொகை ரூ.14 லட்சத்திற்கும் அதிகமாக இருக்கக்கூடும்.

இறுதி முடிவு அரசின் கையில்

தற்போது வெளியாகும் அனைத்து கணக்கீடுகளும் ஊழியர் சங்கங்கள் கோரியுள்ள 3.68 ஃபிட்மென்ட் ஃபாக்டர் அடிப்படையிலான மதிப்பீடுகள் மட்டுமே. மத்திய அரசு எந்த ஃபிட்மென்ட் ஃபாக்டரை இறுதியாக அங்கீகரிக்கிறது என்பதையே சம்பள உயர்வும், அரியர் தொகையும் தீர்மானிக்கும். எனவே, அதிகாரப்பூர்வ அறிவிப்புக்காக அரசு ஊழியர்கள் ஆவலுடன் காத்திருக்கின்றனர்.