இந்தி மூலம் தமிழ் கற்கும் வகையில் இணையவழி சான்றிதழ் படிப்பு – செம்மொழி தமிழாய்வு மத்திய நிறுவனம் விரைவில் அறிமுகம்

இந்தி மூலம் தமிழ் கற்கும் வகையிலான இணையவழி சான்றிதழ் படிப்பு ஓரிரு மாதங்களில் அறிமுகப்படுத்தப்பட உள்ளது. இதற்குப் பிறகு மலையாளம், கன்னடம், தெலுங்கு மற்றும் ஆங்கிலம் மூலமாகவும் தமிழ் கற்பதற்கு இதே போன்ற சான்றிதழ் படிப்புகள் செம்மொழி நிறுவனம் சார்பில் அறிமுகப்படுத்தப்படும் என அந்நிறுவன இயக்குநர் இரா.சந்திரசேகரன் செய்தியாளர்களிடம் கூறினார்.

சென்னை பெரும்பாக்கத்தில் உள்ள செம்மொழி தமிழாய்வு மத்திய நிறுவனத்தின் சார்பில் இந்தி மொழியில் மொழிபெயர்க்கப்பட்ட திருக்குறள் 2022 ம் ஆண்டு வெளியிடப்பட்து. தற்போது இது 5வது பதிப்பை எட்டியுள்ளது. இந்தியில் மொழிபெயர்க்கப்படும் தமிழ் நூல்கள் வட மாநில மக்களிடையே மிகுந்த வரவேற்பைப் பெற்று வருகின்றன. தற்போது வட மாநிலங்களில் தமிழ் இலக்கியங்கள், இலக்கணங்கள் குறித்த கருத்தரங்குகள் விவாதங்கள் நிறைய நடைபெற்று வருகின்றன. நமது இலக்கியங்களை இந்தி மொழியில் வடமாநிலத்தவர் புரிந்துகொண்டு நமது வரலாறு பண்பாட்டை புரிந்து கொள்கின்றனர்.

இந்த நிறுவனத்தின் மூலமாக திருக்குறள் இதுவரை 25 இந்திய மொழிகளில் மற்றும் 9 வெளிநாட்டு மொழிகளில் என மொத்தம் 34 மொழிகளில் வெளியிடப்பட்டுள்ளது. வரும் பொங்கல் திருநாளன்று 23 இந்திய மொழிகள் மற்றும் 7 வெளிநாட்டு மொழிகள் என மொத்தம் 30 மொழிகளில் திருக்குறள் வெளியிடப்பட உள்ளது. இவற்றில் நீலகிரியில் பேசக்கூடிய இருளர், காட்டுநாய்க்கர் உள்ளிட்ட பழங்குடியின மொழிகளும் அடங்கும்.

உலகம் முழுதும் 100 மொழிகளில் திருக்குறளை வெளியிட்டு 2026ம் ஆண்டு ஆகஸ்டு மாதத்திற்குள் நமது தமிழ் பாரம்பரியம் உலகம் முழுதும் பரவச் செய்ய இலக்கை அடையத்் திட்டமிடப்பட்டுள்ளது.

இந்தி மூலம் தமிழ் கற்பதற்காக தலா 30 நிமிடங்கள் கொண்ட 90 காணொலிகள் செம்மொழி நிறுவனத்தில் உருவாக்கியுள்ளோம். இவை விரைவில் இணைய வழியில் பதிவேற்றம் செய்யப்படும். இந்த காணொலிகளின் ஒவ்வொரு அத்தியாயத்தின் இறுதியிலும் பாடப்பொருள் தொடர்பாக சில வினாக்கள் இடம் பெற்றிருக்கும். நான்கு மாதங்களுக்கு பிறகு இ.தற்கான தேர்வு நடத்தப்பட்டு கற்போருக்கான சான்றிதழ் வழங்கப்படும் எனவும் அவர் கூறினார்.